చిత్రప్రభ 22జూలై 2010 సంచిక లొ నే రసిన వీటిపై మీ అబిప్రాయం చెబుతారు కదూ!

Advertisements
Posted in Uncategorized | 2 Comments

Anu Immaneyel articke in Yugabharat Jan.2018

Image | Posted on by | Leave a comment

2017 year review on movies

Image | Posted on by | Leave a comment

My article in Harivillu ManaTelanga 10-12-17

My article in Harivillu ManaTelanga 10-12-17

Telugu-old-heros

తెలంగాణ తొలి కథానాయకుడు కత్తి కాంతారావు

జానపద కథా నాయకుడుగా, కత్తి వీరుడుగా, వెండితెర నారదుడిగా ఎనలేని గుర్తింపు పొందిన అగ్రహీరో కాంతారావు. తెలుగుసినిమాలలో ఆ రోజులలో ఎన్టీరామారావు, నాగేశ్వరరావు తర్వాత చెప్పుకోదగ్గ ఫాన్ ఫాలోయింగ్ ఉన్న నటుడు కాంతారావు. ఖమ్మంజిల్లా కోదాడ సమీపంలోని గుడిబండ గ్రామంలో జన్మించారు. చిన్నప్పటి నుంచే నాటకాల పిచ్చి ఉండేది. మైనార్టీ తీరకుండానే వారసత్చంగా వచ్చిన మాలీపటేల్ (గ్రామ మున్సబు)వుద్యోగం వచ్చింది. అది చేస్తూనే నాటకాల్లో నటిస్తూ వుండేవారు. హెచ్.ఎం.రెడ్డి నిర్దోషి చిత్రంలో తొలిసారి కెమెరా ముందుకు చేరిన కాంతారావు నిర్దోషి చిత్రంలో చిన్న పాత్ర పోషించి, పత్రిజ్ఞ సినిమాలో హీరోగా మారి జానపద కథానాయకుడిగా ఎంట్రీ ఇచ్చారు. కాంతారావును ఎన్‌టిఆర్ సోదరుడుగా, ఆప్తుడుగా భావించి ఆదరించారు. తనునటించే చిత్రాల్లోనేకాదు తెలిసున్న దర్శక నిర్మాతల చిత్రాల్లో కూడా అవకాశాలు కల్పించేవారు. ఆ విధంగా ఆయనకు అనేక అద్భుతమైన సినిమాలలో నటించే అవకాశం లభించింది. ఆ రోజులలో యమబిజీ ఆర్టిస్టుగా కాంతారావు గుర్తింపు పొందారు. ఎన్టీరామారావు తర్వాత రాముడిగా, కృష్ణుడిగా నటించి ప్రేక్షకాదరణ పొందారు. తర్వాత నిర్మాతగా మారి సప్తస్వరాలు సినిమా తీసి నష్టపోయారు. ఆ తర్వాత గండరగండడు సినిమా తీసి మంచి హిట్ కొట్టారు. అదే బేనర్‌పై తీసిన ప్రేమ జీవులు, గుండెలు తీసిన మొనగాడు సినిమాలు వరసగా ఫట్ మనడంతో ఇల్లూవాకిలి అమ్మి రోడ్డునపడ్డారు. చివరాఖరి ఆశగా వాణిశ్రీ సలహాపై తీసిన స్వాతిచినుకులు సినిమా కోలుకోలేని దెబ్బతీయడంతో కాంతారావు పూర్తిగా చితికిపోయారు. టివి సీరియల్స్‌లో అతి తక్కువ పారితోషకంతో నటిస్తూ చిన్న ఇంట్లో అనేక కష్టాలు భరించారు. జీవితంలో సుఖాల కంటే కష్టాలు, భయాలే ఎక్కువ అనుభవించిన నష్టజాతకుడు కాంతారావు.

ఆర్‌నాగేశ్వరరావు’ దెబ్బ గొల్కొండ అబ్బా ‘
దొంగరాముడు సినిమాలో బాబులు గాడి పాత్ర పోషించిన అందమైన విలన్ అనిపించిన నటుడు ఆర్. నాగేశ్వరరావు. చక్కని మేనరిజం, డిగ్నిఫైడ్ బిహేవియర్‌తో ఆరడుగుల బుల్లెట్‌గా అందరి అభిమానాన్ని సంపాదించిన వాడు ఆర్. నాగేశ్వరరావు! క్లాస్‌ను, మాస్‌ను ఒకేలా అదరగొట్టిన ఈయన అసలుపేరు రాజనాల నాగేశ్వరరావు. అలీఘడ్ యూనివర్సిటీలో చదివి హైదరాబాద్‌లో పూర్ణా అండ్ ప్రీమియర్ డిస్ట్రిబ్యూషన్ సంస్థలో మేనేజర్‌గా, తర్వాత సికింద్రాబాద్ పేరామౌంట్ థియేటర్ జనరల్ మేనేజర్‌గా పనిచేసిన ఆర్ నాగేశ్వరరావు ఉద్యోగ జీవితం బోర్ కొట్టి విజయా వారి సినిమాలు పంపిణీ చేసే ప్రీమియర్ పంపిణీ సంస్థలో చేరాడు. షావుకారు చిత్రం పంపిణీ గురించి మద్రాసు షూటింగ్ స్పాట్‌కి వెడితే దర్శకుడు ఎల్.వి.ప్రసాద్ నటుడుగా ప్రయత్నం చేయమన్నారు. తరువాత సి.పుల్లయ్య దృష్టిలో పడటంతో సంక్రాంతి సినిమాలో పాపారావుగా నటించాడు. వెంటనే రాజుపేదలో అవకాశం వచ్చింది. నాటకానుభవం లేకున్నా, నటనలో శిక్షణ లేకున్న సహజ నటనతో కట్టిపడేసేవారు. రింగ్ రింగులుగా పొగ వదులుతూ ప్రత్యేక పద్ధతిలో సిగరెట్ కాల్చేవారు. అనేక స్పెషాలిటీలు ఉన్న ఆర్ నాగేశ్వరరావు 33వ ఏట క్యాన్సర్‌తో మృతిచెందారు. ఆయన పార్దివ శరీరాన్ని చూడడానికి తెలుగు, తమిళ సినీ ప్రముఖులేకాదు హిందీ సినీరంగానికి చెందిన దిలీప్‌కుమార్, సి.రామచంద్ర ప్రభృతులు రావడం వలన ఆయన తడాఖా ఏపాటిదో అర్థం చేసుకోవచ్చు.

ప్రతిభావంతుడు ప్రభాకర్‌రెడ్డి

చక్కని కుటుంబ కథా చిత్రాలకు, వెటకారపు రాజకీయ వ్యంగ్య చిత్రాలకు ఒకేస్థాయిలో కథ అందించిన అభిరుచిగల రచయిత, దర్శక నిర్మాత ప్రభాకర్‌రెడ్డి. చిన్నతనం నుంచి రంగస్థల నటుడుగా, బుర్రకథలు చెప్పేవానిగా పేరు తెచ్చుకున్నా చదువు నిర్లక్షం చేయక ఉస్మానియా మెడికల్ కాలేజీ నుంచి ఎంబిబిఎస్ పూర్తి చేశారు. హౌస్ సర్జన్ చేస్తుండగా ‘చివరికి మిగిలేది’ సినిమాలో సైకియాట్రిస్ట్ పాత్ర పోషించి, తెలుగు చిత్ర సీమకు గుత్తా రామినీడు ద్వారా పరిచయం అయ్యారు. నల్లగొండ జిల్లా తుంగతుర్తి గ్రామంలో జన్మించిన ప్రభాకర్‌రెడ్డికి పౌరాణిక, జానపద, సాంఘిక, చారిత్రక చిత్రాల్లోని పాత్రలు పోషించడానికి అనువైన పర్సనాల్టీ వుండేది. 27 సినిమాలకు నిర్మాతగా, 21 చిత్రాలకు కథారచయితగా వ్యవహరించిన ప్రభాకర్‌రెడ్డి 472 చిత్రాలలో వివిధ పాత్రలు పోషించారు. గాంధీ పుట్టిన దేశం, పండంటి కాపురం, కార్తీక దీపం, గృహ ప్రవేశం, కుంకుమతిలకం చిత్రాలకు కథారచయితగా, నిర్మాతగా, నాకు స్వాతంత్య్రం వచ్చింది, ప్రతిభావంతుడు, ప్రచండ భారతం తదితర చిత్రాలకు నిర్మాతగా వ్యవహరించారు. గండిపేట రహస్యం, ప్రచండ భారతం చిత్రాలకు దర్శకత్వం వహించిన ప్రభాకర్‌రెడ్డి హిందీ చిత్రాలలో కూడా నటించారు.

విలన్ త్యాగరాజు

విలన్ త్యాగరాజు విచిత్రమైన బాడీ లాంగ్వేజ్, మేన రిజం కలిగిన డిఫరెంట్ నటుడు త్యాగరాజు. వరంగల్‌లో పుట్టిన త్యాగరాజు ఎన్.టి.ఆర్ హీరోగా రూపొందిన ‘మంచి మనిషి’ సినిమాలో నటించి మంచి గుర్తింపు పొందాడు. వివిధ సినిమాలలో నటించినా ఆయనకు పాపకోసం సినిమా పెద్ద పేరు తెచ్చిపెట్టింది. రంగుల రాట్నంలో నడిరేయి ఏజాములో పాటలో నటించిన త్యాగరాజు షిర్డీసాయి మహత్యం సినిమాలో సాయి శరణం బాబా శరణు శరణం పాటలో నటించి తెలుగు వారికందరికీ గొప్పగా గుర్తుండిపోయాడు.

రియల్ స్టార్
వాచకంలో వైవిధ్యం, తెలంగాణా యాస మాట్లాడడంలో మంచి గ్రిప్, డిఫరెంట్ ఫ్లోతోపాటు కారక్టర్‌తో ఎడతెగని ఇన్వాల్వ్‌మెంట్ ఉన్న అరుదైన నటుడు, రియల్‌స్టార్ శ్రీహరి. డిఫరెంట్ స్టయిల్‌లో ఫైట్స్ చేసి వెండితెరపై తనదైన ముద్ర వేసిన శ్రీహరి మంచి విలన్‌గా, మనసున్న సహాయ నటుడుగా, క్యారెక్టర్ ఆర్టిస్ట్‌గా రాణించినవాడు, సామాజిక సేవలో మమేకమై తన రూటే సపరేటు అనిపించుకున్నవాడు శ్రీహరి. హైదరాబాద్‌లోని బాలానగర్‌లో చిన్నరేకులషెడ్డులో అతి సామాన్య జీవితం గడిపిన శ్రీహరి జిమ్నాస్టిక్ నేర్చుకుని రాష్ట్రస్థాయి, జాతీయస్థాయి పోటీల్లో పతకాలు సాధించారు. స్పోర్ట్స్ కోటాలో ఉద్యోగం వస్తే మరింత ఉన్నత్యోద్యోగి అవ్వాలని పోలీస్ సబ్ ఇన్‌స్పెక్టర్, రైల్వే ఉద్యోగాలను వదులుకున్నారు. ఒడ్డూ పొడుగు, కండలు తిరిగిన శరీరం గల శ్రీహరి సాంబయ్య, దేవా, అయోధ్య రామయ్య, భద్రాచలం చిత్రాలలో డిఫరెంట్ హీరోగా, యాక్షన్ హీరోగా వెలిగిపోయారు. నువ్వొస్తానంటే నేనొద్దంటానా సినిమాలో త్రిషకు అన్నగా మహానంది సినిమాలో అనుష్క అన్నగా, ఢీలో జెనీలియా అన్నగా నటించి ప్రేక్షకుల అభిమానాన్ని దోచుకున్నారు. మంచి గుర్తింపు తెచ్చుకున్నారు సంభాషలు పలకడంలో. తెలంగాణ యాసలో మాట్లాడటంలో ఒక ప్రత్యేక శైలి ఏర్పరచుకున్నారు. హీరోగా చేస్తూనే విలన్‌గా, కేరక్టర్ ఆర్టిస్టుగానూ కొనసాగారు. మేడ్చల్ నాలుగు గ్రామాలు దత్తత తీసుకుని అభివృద్ధి చేశారు. మగధీరలో షేర్‌ఖాన్‌గా ప్రత్యేక గుర్తింపు తెచ్చుకున్న శ్రీహరి 2013 అక్టోబర్ 9న ముంబైలో కాలేయ సమస్యతో మృతిచెందారు.

టాకీ పులిగా గుర్తింపు పొందిన హెచ్.ఎం.రెడ్డి. తెలుగులో బొంబాయిలో తొలిసారి రూపొందించిన టాకీ చిత్రం భక్త ప్రహ్లాదకు చందాల కేశవదాసు రాసిన మూడు పాటలు, ధర్మవరం రామకృష్ణ మాచార్య రాసిన ఒకటవ పాటను కూడా ఉపయోగించారు. 1931లో విడుదలైన తొలి తెలుగు టాకీ చిత్రం ఈ భక్తప్రహ్లాద.
ఖమ్మ ం జిల్లా జక్కపల్లి గ్రామంలో చందాల పాపమ్మ, లక్ష్మీనారాయణ దంపతులకు కేశవదాసు 1875 జూన్ 20న జన్మిం చారు. హరి కథా భాగవతారుగా, అష్టావధానిగా, కవిగా గుర్తింపు తెచ్చుకు న్నారు. అమిత ప్రజాదరణ పొందిన కనకధార నాటక రచయిత కూడా ఈ యన. ఆ రోజుల్లో ధర్మవరం రామకృష్ణమాచార్య రాసిన ప్రహ్లాద, ముత్తరాజు సుబ్బా రావు రాసిన శ్రీకృష్ణ తులాభారం నాటకాలు ప్రేక్షకాదరణ కారణంగా వివిధ చోట్ల ప్రదర్శితమయ్యేవి. వీటిని తరువాత సినిమాలుగా రూపొందించారు.

మూకీ టాకీలలోనూమనమే ముందు

* సినిమా నిర్మాణం ఓం ప్రథమంగా ఆరంభమైన రోజులలో బొంబాయి, కలకత్తా, కొల్హాపూర్, మద్రాసు నగరాలతో సరిసమానంగా హైదరాబాద్‌లో 1922వ సంవత్సరం చివర్లో మూకీ చిత్రాల నిర్మాణం ప్రారంభమైంది.

* నిజాం మీర్ ఉస్మాన్ అలీఖాన్ కలకత్తాకి చెందిన ధీరేంద్రనాద్ గంగూలిని ఆహ్వానించి ఆర్ట్స్ కాలేజి ప్రిన్సిపాల్‌గా నియమించారు. మీర్ ఉస్మాన్ అలీఖాన్‌కు సన్నిహితుడు అయ్యారు. ఆయనకు సినిమాల మీద ఆసక్తి ఉందని తెలియడంతో నిజామ్ తన సహకారం అందించారు. లోటస్ ఫిలిం కంపెనీని ఏర్పరిచి మూకీ చిత్రాలు నిర్మించారు. ఇండో బ్రిటిష్ ఫిలిం కంపెనీ, బ్రిటిష్ డొమినియన్ ఫిలింస్ అనే ఫిలిం కంపెనీలను, రెండు థియేటర్లను నడిపించారు ధీరేంద్ర నాథ్ గంగూలి. లేడీ టీచర్, ఇంద్రజిత్, హరగౌరి, చింతామణి,స్టెప్ మదర్,యాయాతి,మేరేజ్ టానిక్, మూకీచిత్రాలను (సైలెంట్ మూవీలు)రూపొందించారు.

బొంబాయిలో తయారైన రజియాబేగం (ముస్లిం యువరాణి హిందూ యువకుని ప్రేమలో పడే ఇతివృత్తంలో) చిత్రానికి డిస్ట్రిబ్యూటర్‌గా వ్యవహరించి 1924లోహైదరాబాద్‌లో ప్రదర్శించారు. ఈ చిత్రం చూసిన ఫ్యూడలిస్టులు, ముస్లింలు ఆయనపై నిజాంకు తీవ్రంగా ఫిర్యాదు చేశారు. ఆగ్రహించిన నిజాం ఆ చిత్రాని చాలాచోట్ల నిషేధించి రాత్రికి రాత్రి హైదరాబాద్ వదిలి వెళ్లిపొమ్మని ధిరేన్ బాబుని ఆదేశించారు.ధీరేంద్రనాథ్ గంగూలి హైదరాబాద్ వదిలివేయడంతో చిత నిర్మాణంలో స్తబ్దత ఏర్పడింది.
* సికింద్రాబాద్‌లోని మహావీర్ ఫొటోఫ్లేస్ సంస్థ 1929లో చిత్ర నిర్మాణానికి శ్రీకారం చుట్టింది. రాజా ధర్మ, ఐడియల్ వుమెన్ ఇలా ఏడుసైలెంట్ చిత్రాలను నిర్మించి విడుదల చేసింది. ఆ స్ఫూర్తితో హైదరాబాద్‌లో నేషనల్ ఫిలిం కపెనీని ఏర్పరిచారు. 1931, 1932 సంవత్సరాల్లో వీరు మూడు మూకీ చిత్రాలు నిర్మించారు. ఆ తర్వాత సారథి స్టూడియోస్ నిర్మాణం పూర్తయ్యే వరకు హైదరాబాద్‌లో చిత్ర నిర్మాణం జరగక గ్యాప్ వచ్చింది.
* బొంబాయిలో టాకీ చిత్రాల నిర్మాణం ప్రారంభమైన సమయంలోనే హెచ్.ఎం.రెడ్డి తెలుగులో నిర్మించిన భక్త ప్రహ్లాద (1931) చిత్రానికి మూడు పాటలను చందాల కేశవదాసు రచించాడు. ఈయన ఖమ్మం జిల్లా జక్కేపల్లి గ్రామానికి చెందిన వాడు.చందాల కేశవదాసు తెలంగాణకు చెందిన తొలి పాటల రచయత. ఆ తరువాత దాశరథి,సి.నారాయణ రెడ్డిలను పాటల రచయతలుగా ఇంచుమించు ఒకే సమయంలో తెలుగు చిత్రపరిశ్రమ ఆహ్వానించింది.

చిత్రపరిశ్రమలో తెలంగాణ బిడ్డలు :

* అక్టోబర్ 1950లో కాంతారావు మద్రాసు చేరాడు. తెలంగాణ కి చెందిన టి.కృష్ణ (తరువాత కాలంలో దర్శకుడు,ఎడిటర్ గా
రాణించిన)సహాయ దర్శకుడుగా నిర్దోషికి పనిచేస్తూ చేసిన హెచ్.ఎం.రెడ్డికి పరిచయమయ్యాడు. నిర్దోషి1951 చిత్రంలో నటించాడు. ఆ తర్వాత పత్రిజ్ఞ సినిమాలో హీరోగా నటించి జానపద కథానాయకుడుగా కూడా మంచి గుర్తింపు పొందారు.
* హైదరాబాద్‌లోని పూర్ణా అండ్ ప్రీమియర్ డిస్ట్రిబ్యూషన్ సంస్థ మేనేజర్‌గా పనిచేసే ఆర్.నాగేశ్వరరావును మద్రాసులో చూసిన సి.పుల్లయ్య సంక్రాంతి (1952) చిత్రంలో పాపారావుగా నటింపజేశారు. తర్వాత విలన్‌గా మంచి ప్రాచుర్యం పొందారు.
* నటుడుగా కెరీర్ ప్రారంభించిన నల్గొండ జిల్లా తుంగతుర్తి నివాసి ప్రభాకర్‌రెడ్డి విలన్‌గా, దర్శక, నిర్మాతగా, రచయితగా పేరు తెచ్చుకున్నాడు.
* వరంగల్‌కు చెందిన త్యాగరాజ్ విలన్‌గా మంచి గుర్తింపు పొందారు.
* నటుడుగా, నిర్మాతగా శ్రీహరి పేరు తెచ్చుకున్న పేరు అంతాఇంతా కాదు.
* బాలీవుడ్‌లో పేరొందిన పైడి జయరాజ్, షర్మిలా ఠాగూర్, సుస్మితా సేన్, షబ్నా అజ్మీ, థియామీర్జా, తబూ హైదరాబాదీలే!
* తెలుగులో బాగా క్లిక్ అయిన మాధవి హైదరాబాద్‌లో జన్మించినదే!
* ఈ తరంలో పాపులర్ అయిన ముత్యాలముగ్గుసంగీత,అజిత్ కుమార్, వివేక్ ఒబెరాయ్, అదితీ రావు హైదరీ, నితిన్, విజయ్ దేవరకొండ, నిఖిల్ సిద్ధార్థ్, తాగుబోతు రమేష్, వేణుమాధవ్, శివారెడ్డి, వెన్నెల కిశోర్, ఉత్తేజ్, సంపూర్ణేశ్ బాబు, ఉదయభాను ప్రభృతులు తెలంగాణ వారే.
* సంగీత దర్శకులుగా మంచి గుర్తింపు పొందిన శంకర్ జై కిషన్, లత శంకర్, వందేమాతరం శ్రీనివాస్, చక్రి మన వారే.
* దర్శక నిర్మాతలుగా రాణించిన శ్యామ్ బెనిగల్, బి. నర్సింగ్‌రావు, సికింద్రాబాద్‌కి చెందినవారు. దర్శకలు కె.దశరథ, భరత్ పారేపల్లి, హరీష్ శంకర్, ఎస్.శంకర్, సంపత్‌నంది, సురేందర్‌రెడ్డి, నాగేష్ కుమార్, కబీర్ ఖాన్ క్కడి వారే.
* నిర్మాతలు దిల్ రాజు, మధుర శ్రీధర్ తెలంగాణవాసులే.
* డా. సి.నారాయణరెడ్డి, దాశరథి కృష్ణమాచార్య దాదాపుగా ఒకేసారి కెరీర్ ప్రారంభించారు.
* వడ్డేపల్లి కృష్ణ, గద్దర్, సుద్దాల అశోక్‌తేజ, చంద్రబోస్, వెనిగళ్ల రాంబాబు తమ పాటలతో అలరిస్తున్నారు.

Posted in Uncategorized | Leave a comment

My article in Harivillu Mana Telangana 17-12-17

బాపు బొమ్మరో…!

BHAPU-IMAGE

బుడుగు బొమ్మ వున్న కార్టూన్ కనిపించినా, వివిధ రచయితల పుస్తకాల మీదున్న ఆకర్ణణీయమైన కవర్ పేజీ మీదున్న బొమ్మను చూసినా, పదారణాల తెలుగమ్మాయి సంప్రదాయరీతిలో మూమూలుగా కనిపించినా, లేదా వెండితెరపై అగుపించినా ‘బాపు బొమ్మరో’ అంటారు అభిమానులు. కొన్ని సినిమాలు చూడగానే వాటిలోని ప్రత్యేకతలు ఇది బాపు మార్క్ చిత్రం అనిపింపజేస్తాయి. పిల్లలను ఆకట్టుకునేలా వీడియో పాఠాలు చూపడం, అందరినీ ఆకట్టుకునేలా, అర్థమయ్యేలా, ప్రత్యేక తరహాలో దర్శకుడుగా సినిమాలు తీయడం బాపుకే చెల్లు.

గోదావరి అందాలు చూపుతూ ఊరి రౌడీకి భయపడే అమాయకుడి కథను వివరించే ‘సాక్షి’, గోదావరి నది అందాలు, రాజమండ్రి నుంచి భద్రాచలం వరకు వెన్నెల్లో పడవల మీద చూపిస్తూ, రామభక్తిని, ఆకలి బాధను, తీతా (తీసేసిన తాసిల్దారు ప్రహసనం) జోక్‌లతో ‘అందాల రాముడు’, భక్తితత్పరత, సామాజిక వర్తనను వివరించే బుద్ధిమంతుడు, రామాయణకథ ఆధారంగా రూపొందిన పౌరాణిక చిత్రాలు, ఉత్తర రామాయణ కథతో తీసిన ‘ముత్యాల ముగ్గు’, సతూకోనంటూ మారాం చేసి యజమాని కష్టాల్లో ఉన్నపుడు ఆదుకున్న ‘రాంబంటు’, ఉద్యోగం కోసం అబద్దాలు చెప్పి, ఒకే చోట ఉద్యోగంలో చేరిన దంపతుల అల్లరి తెలిపే‘పెళ్లి పుస్తకం’, భారతాన్ని సోషలైజ్ చేస్తూ యువకులతో తీసిన ‘మనవూరి పాండవులు’ ఇవన్నీ బాపులోని కళాకారుణ్ణి, సృజనశీలిని, ఆయనలోని వైవిధ్యాన్ని వివరిస్తాయి. ఇందుకు కారణం చిన్నతనంలోనే మద్రాసులో పరిచయమై చిన్ననాటి స్నేహంలోనే ఇడ్లీ పచ్చడిలా మెప్పించడానికి, పెద్దయ్యాక దర్శకుడు, అవడానికి కారకుడై చివరి వరకు ‘స్నేహం’ మాధుర్యాన్ని చాటిన ముళ్లపూడి వెంకటరమణ. ఇది ఎంతవరకు అంటే బాపు అనగానే ముళ్లపూడి, ముళ్ల్లపూడి అనగానే బాపు గుర్తువచ్చేంత వరకు. అంతేకాదు బాపు సినిమా అంటే ముళ్లపూడి కథ, డైలాగ్స్‌లో విరుపులు, హాస్యం తప్పనిసరి అనేంతవరకు. మరో విషయం వీరిలో ఎవరి గురించి రాయాలన్నా రెండో వారు ఆటోమేటిగ్గా దూరిపోతారు. దూరిపోయేంత గాఢమైన మైత్రీబంధం అన్నమాట. ప.గో-తూ.గో (పశ్చిగోదావరి బాపుది, తూర్పు గోదావరి ముళ్లపూడిది) బంధం చెన్నపట్నంలో సిసలైన తుమ్మజిగురుగా ఇప్పటి ఫెవికాల్ మాదిరిగా అంటుకు పోయేలా చేసిందంటే అది ఎన్ని జన్మల బొమ్మమాటల (పత్రికా )బంధమో మరి!

తెలుగమ్మాయి (విజయనిర్మల, వాణిశ్రీ, జయప్రద, సంగీత, ఆమని, దివ్యవాణి వగైరా) పరాయి భాష, పర రాష్ట్ర అమ్మాయి (లత , స్నేహ, పూర్ణిమా జయరాం, సుహాసిని, నయనతార) అయినా కట్టుబొట్టులో, జడ విసురుడులో, ముగ్ధలా కనిపించడంలో అసలు సిసలు పదారణాల ‘తెలుగమ్మాయి’అయిపోయి మంచి అనుభూతిని కలిగిస్తారు.

సత్తిరాజు సూర్యకాంతం, వేణుగోపాలరావు దంపతులకు నర్సాపురంలో 1933, డిసెంబర్ 15న జన్మించాక పెట్టిన పేరు లక్ష్మీనారాయణ. తరువాత తల్లిదండ్రులతో మద్రాసుకు మకాం మార్చారు. మళ్లీ 1942 – 1948 మధ్య నర్సాపురంలో చదివారు. తరువాత మద్రాసుకు మకాం. చిన్నతనం నుంచే బొమ్మలు వేయడం అలవాటు. ముళ్లపూడి వెంకటరమణ రాసిన కథకు 12వ ఏట బాపు వేసిన బొమ్మతో ‘బాల’ అనే పిల్లల పత్రికలో ప్రచురణ అయింది. అది కొనసాగుతూ వచ్చింది. ఆ వయసులోనే బాపు వేసిన బొమ్మతో తన కథ పట్టుకుని ఎడిటర్ విద్వాన్ విశ్వం దగ్గరకు ముళ్లపూడి వెడితే ఇడ్లీ కంటే చట్నీ బాగుందనడం విశేషమే. బాపు బి.కాం డిగ్రీ తీసుకున్నాక బి.ఎల్. కూడా చదివారు. ముళ్లపూడి పత్రికలో చేరి కథలు గట్రా రాస్తుంటే వాటికి బొమ్మలు వేయడమే కాక, ఆంధ్రపత్రికకు, పుస్తకాలకు బొమ్మలు , కార్టూన్లు వేసేవారు బాపు. ముళ్లపూడి సినీ రచయిత అయి విజృంభించాక, దర్శకులకి సంబంధించి ఎలాంటి శిక్షణా ఎవరి దగ్గర తీసుకోకుండానే కృష్ణ, విజయనిర్మల, విజయలలిత ప్రభృతులతో ‘సాక్షి’ చిత్రానికి దర్శకుడయ్యారు. ఆ సినిమా 1967లో విడుదలయ్యాక, ఇది ‘సాక్షి’నామ సంవత్సరం అని ప్రకటనలు గుప్పించినపుడు చాలా మంది తెలుగులోని 60 సంవత్సరాల లిస్టుని పదే పదే చూసి సాక్షినామ సంవత్సరం లేదే, కనిపించడం లేదే అనుకోవడం చిత్రమే. పెయింటర్‌గా, కార్టూనిస్టుగా, డిజైనర్‌గాను గుర్తింపు పొందారు సంగీత ప్రియుడు. ఆయన ఇంటి నిండా రికార్డులే.

సినిమా స్క్రిప్ట్ తయారయ్యాక పాత్రధారుల నటనకి సంబంధించి బాపు వేసే బొమ్మలు జాగ్రత్తగా పరిశీలిస్తే ఆయా నటీనటులు పాత్రలోకి సులువుగా పరకాయ ప్రవేశం చేయవచ్చు.అక్కినేని ఒక సందర్భంలో మాట్లాడుతూ “ బాపు ప్రతి షాట్‌కి బొమ్మలు వేస్తారు. వాటిని ఫాలో అయితే పాత్రలో మమేకం అయిపోవచ్చు. ‘బుద్దిమంతుడు’ ఇతివృత్తం విని రెండు పాత్రలూ ఇష్టపడి చేసాను. అందాల రాముడు కూడా అంతే. నయనతారకు ‘శ్రీరామరాజ్యం’లో సీతగా అంత గుర్తింపు వచ్చిందంటే బాపు వేసిన బొమ్మలను ఆమె అవగాహన చేసుకున్నందుననే. బాపు తీసేవి దృశ్య కావ్యాలు. రావలసినంత పేరు ఆయనకు రాలేదు“ అన్నారు.

‘సీతా కల్యాణం’లోని గంగావతరణం దృశ్యాలు, ‘బాలరాజు కథ’లో మహాబలిపురం దృశ్యాలు, పాటలు, బాలుడి నటన , ‘రాజాధిరాజు’ చిత్రంలో కొత్త దేవుడు (నూతన్ ప్రసాద్) గెటప్ డైలాగ్స్, ‘ముత్యాల ముగ్గు’, ‘కలియుగ రావణాసుడు’లో రావు గోపాలరావు డైలాగ్స్, ‘మనవూరి పాండవులు’ చిత్రంలో చిరంజీవి, మురళీమోహన్, నేటి కృష్ణుడుగా కృష్ణంరాజు, ‘అందాల రాముడు’లో తీతాగా అల్లు, ఆకలికి అలమటించిన జమిందార్‌గా నాగభూషణం, ‘పెళ్ళి పుస్తకం’, ‘మిస్టర్ పెళ్ళాం’, ‘రాంబంటు’ చిత్రాలలో రాజేంద్రప్రసాద్ ప్రభృతుల నటన, చిత్రీకరణ, దృశ్య సౌందర్యం వర్ణనాతీతం. పాటలు, పాటల్లోని సాహిత్యం వాటిని చిత్రీకరించిన తీరు అద్భుతం.

రామభక్తుడైన బాపు, హనుమంతుడునీ ఆరాధిస్తారు. ఆయన చాలా చిత్రాల్లోని కథలు, పాత్రలు రామాయణంలోంచి వచ్చినవే.బాపు సాధారణంగా ఉచితంగానే రచయితలు అడిగితే వారి పుస్తకాలకు కవర్ పేజీ బొమ్మ వేసేవారు. ఒక జోక్ కూడా వుంది“ బాపు నా పుస్తకానికి బొమ్మ వేస్తానన్నారు. మూడు వేలు తీసుకున్నారు” అని ఓ రచయిత చెప్పాడు.” బొమ్మ వేయడానికా” అని మిత్రుడు అడిగితే “ కాదు పుస్తకం చదవడానికి” అని వినీ వినబడకుండా బదులిచ్చాడు. రామాయణ విష వృక్షం రచించిన ముప్పాళ్ల రంగనాయకమ్మ ముఖ చిత్రం వేయమని కోరుతూ బ్లాంక్ చెక్ పంపారట. బ్లాంక్ చెక్ అంటే ఆయన దాని మీద ఎంత డబ్బు అయినా రాసుకోవచ్చు, మార్చుకుని తీసుకోవచ్చు. కొంత కాలం తర్వాత పోస్టులో రంగనాయకమ్మకు కవరు చేరింది. బొమ్మ కోసం ఆత్రంగా విప్పితే ముఖ చిత్రం లేదు గానీ, చెక్కు వెనుక ‘ రామ రామ రామ రామ’ అని రాసిన బాపు మాటలు ఉన్నాయట.

‘సంపూర్ణ రామాయణం’ చిత్రాన్ని శోభన్‌బాబు, చంద్రకళ ప్రభృతులతో తీసిన తర్వాత ఎన్.టి.రామారావు బాపు రమణ, శోభన్‌లపై అలిగారు. కొంత కాలం తరువాత ప్రింట్ తెప్పించుకుని చూసి ఆనందించారు. ఆయనే ముఖ్యమంత్రి అయ్యాక పిల్లలకు వీడియో పాఠాలు తీయడానికి ఎందరు అభ్యంతర పెట్టినా బాపు రమణ బెస్ట్ అని ఆ ప్రాజెక్ట్ వారికి అప్పగించారు. అంతేకాదు తాను నిర్మించే ‘శ్రీనాథ కవిసార్వభౌమ‘ చిత్రానికి రచన, దర్శకత్వ బాధ్యతలను రమణ బాపులకు కల్చించారు.

‘సీతా కళ్యాణం’ చిత్రం అనేక అంతర్జాతీయ చిత్రోత్సవాల్లో ప్రదర్శితం కావడమే కాకుండా బ్రిటిష్ ఫిలిం ఇన్‌స్టిట్యూట్‌లో ఆ చిత్రాన్ని ఒక కోర్సుగా పెట్టారు. 10 హిందీ చిత్రాలు, 1 తమిళ చిత్రం, 37 తెలుగు చిత్రాలకు దర్శకత్వం నెరిపారు.‘ శ్రీరామరాజ్యం’ ఆయన దర్వకత్వం వహించిన చివరి చిత్రం. ‘బాలరాజుకథ’, ‘అందాలరాముడు’, ‘ముత్యాల ముగు’్గ, ‘పెళ్లి పుస్తకం’, ’మిస్టర్ పెళ్ళాం’, ‘శ్రీరామరాజ్యం’ చిత్రాలకు ఉత్తమ చిత్ర దర్శకుడిగా నంది అవార్డులు లభించాయి. 2014 ఆగష్టు 31న పరమపదించారు.

Posted in Uncategorized | Leave a comment

My article about Anupama Parameswaran in Yugabharat Dec.2017

Image | Posted on by | Leave a comment

పాటల టంకశాల మన ఘంటసాల 3-12-17

My article about Ghantasalaఘంటసాల in Harivillu ManaTelangana 3-12-17
పాటల టంకశాల మన ఘంటసాల
ఘంటసాల… ఆ పేరే చాలు మనసు పులకరించి పోవడానికి , ఆ గానమే నిరంతరం కొత్త అనుభూతులనిస్త్తూ మనసును ఏవేవో లోకాల్లో విహరింపచేయడానికి. అందుకే ఎందరికో ఆయన ఆ గానం అనుదినం గుర్తొచ్చి ఆనందింప చేయిస్తుంది. ఇంకా చాలా మందికి అనుక్షణం స్మరణకు వస్తూ పులకరింపచేస్తుంది. ఆయన ఒక సంగీత మూర్తి గా, సరస్వతీ పుత్రుడుగా అన్ని భాషా గాన ప్రియుల మదిని దోచుకోగలిగారు.గాయకుడి గా అడుగిడిన దశలో, సంగీత దర్శకుడుగా ఎదుగుతున్న క్రమంలో అప్పటి రంగ స్థల గాయక నటులు ఆరోహణ, ఆవరోహణలతో పులకరింప చేస్తూ , కొన్ని సందర్భాలలో కంఠాన్ని విభిన్న కంపనాలకు గురి చేస్తు ప్రేక్షక శ్రోతల హృదయలలో చక్కని చోటు దక్కించు
కుంటుంటే తను ఒకకొత్త దనాన్ని స్వరంలో చూపాలని , మృదువుగా, సౌమ్యంగా ,లలితంగా , సామాన్యంగానే ఆలపిస్తూ అసమాన్య గుర్తింపు తెచ్చుకుంటూ, తన ప్రత్యేకతను చాటారు ఘంటసాల వెంకటేశ్వరరావు.

తొలి దశాబ్దంలో అంటే 1944 నుంచి లలిత గీతాలు , దేశభక్తి గీతాలు, సినీ గీతాలు , పుష్సవిలాపం వంటి వాటిని పై తరహాలోనే ఆలపిస్తూ మంత్ర ముగ్ధులను చేశారు. 1951 నుంచి పాడే పాటల తీరులో మార్పు తీసుకొచ్చారు. అక్కినేని , ఎన్.టి.ఆర్ చిత్రాల్లో వారికి పాటలు పాడుతూ తను పాడే పాట ద్వారా ఎవరికి పాడుతున్నారో వినే వారికి తెలిసేలా తన స్వరంతో బేధాన్ని చూపాలని వారి స్వరాలను అనుసరిస్తున్నట్టు లేదా అనుకరిస్తున్నట్లు పాడుతూ, ఇది అక్కినేనికి పాడిన పాట, అది ఎన్.టి.ఆర్ కి పాడిన గీతం అని ప్రేక్షకులు, శ్రోతలు విన్న క్షణంలోనే గుర్చొచ్చేలా చేసారు. అలాగే హాస్య నటులకు ఎస్‌విఆర్ వంటి వారికి పాడే తీరులోను మార్పు చూపించసాగారు. తన స్వరంతో ఒక్కో దశాబ్దంలో ఒక్కో తరహాలో తన కంఠానికి పదును పెట్టి, పరిణతి వచ్చేలా గానామృతం చిలికించిన అమర గాయకుడు.

ఘంటసాలలోని ఆ ప్రతిభ కారణంగా పాటలే చిత్రవిజయానికి పునాది అవుతాయని అందరు నటులకు పాడమని సంగీత దర్శకులు, దర్శక, నిర్మాతలు ఆసక్తి ప్రదర్శిస్తూ ఒత్తిడి చేసినా తప్పని సరైనప్పుడే పాడుతూ బతుకు, బతికించు, బతుకులు పండించు అనే సిద్ధాంతానికి కట్టుబడి సహచర గాయకులు కూడా చిత్రరంగంలో ఇతోధికంగా వర్ధిల్లేందుకు తన వంతు కృషి చేయడమే గాక జీవితాంతం వరకు ఆ సూత్రాన్నే అనుసరించి మార్గదర్శి అయ్యారు. అంతే కాదు ఎందరో వర్ధమాన గాయకులు వేదికల మీద కచేరీల్లోనూ ఆయన పాటలు పాడటం ద్వారా శ్రోతలను మెప్పిస్తూ చక్కని జీవనోపాధిని పొందుతున్నారు. స్వర జ్ణానం లేని వారు కూడా వీధుల్లో , రైళ్లలో , ఇతర చోట్ల ఘంటసాల పాడిన పాటలే పాడుతూ అదే సంపాదన మార్గంగా చేసుకోవడం విశేషమే ! దేశభక్తి గురించి సత్ప్రవర్తన గురించి , తండ్రి మృదంగ వాయిద్యకారుడైన ఘంటసాల సూరయ్య చెప్పిన మాటలు జీవితాంతం గుర్తుంచుకుని అనుసరించేలా చేసాయి.

క్విట్ ఇండియా ఉద్యమంలో 1942 ఆగస్ట్‌లో పాల్గొని 18 నెలలు కఠిన కారాగార శిక్షను గుడివాడ, రాజమండ్రి, బళ్లారి జైళ్లలో ఆనుభవించారు. ఆ తరువాత దేశం క్లిష్ఠ పరిస్థితుల్లో వున్నప్పుడు సంగీత కచేరీలు నిర్వహించగా వచ్చిన ఆదాయాన్ని దేశ రక్షణ నిధికి ఇచ్చేవారు.

కృష్ణ్ణా జిల్లా పెదపులిపర్రులో మార్చి 3,1944 న ఘంటసాల కు సావిత్రితో వివాహమైన సందర్భంగా ఆయన నిర్వహించిన సంగీత కచేరీ విన్న సీనియర్ సముద్రాల మద్రాసు వచ్చేయమని చెప్పడంతో మే నెలలో మద్రాసు వెళ్లారు. ఘంటశాలను తన కొడుకులా ఆదరించి ఆవకాశాలు కల్పించే ప్రయత్నం చేయడంతో క్రమ క్రమంగా గాయకుడుగా ఎదిగారు. ఈ లోగా శ్రీసీతారామ జననం తదితర చిత్రాల్లో చిన్న వేషాలు వేసారు. బి. ఎన్. రెడ్డి రూపొందించిన స్వర్గ సీమలో భానుమతితో కలసి పాడటంతో ఘంటసాల గాయక ప్రస్థానం – అరే హాలే వెన్నెల చిరునవ్వులు విరజిమ్ము పఠాణీ … గీతంతో ప్రారంభమైంది.

గోపీచంద్ దర్శకత్వంలో శోభనాచల పతాకాన నిర్మించిన లక్ష్మమ్మ చిత్రానికి సంగీత దర్శకత్వం చేసే అవకాశం తొలిసారి వచ్చింది. ఈ చిత్రం చేస్తుండగా ఘంటసాల బలరామయ్య స్వీయ దర్శకత్వంలో అక్కినేనితో నిర్మించిన కీలుగుర్రం చిత్రానికి సంగీత దర్శకుడు అయ్యాడు. కీలుగుర్రం 19 ఫిబ్రవరి, 1949న విడుదలై చిత్రంతో పాటు పాటలు ఘన విజయం సాధించాయి. లక్ష్మమ్మ 26,ఫిబ్రవరి, 1950న విడుదలై ఆ చిత్రం పాటలు హిట్టయ్యాయి.

బాలరాజు చిత్రంలో అక్కినేనికి తొలిసారి , షావుకారు చిత్రంలో ఎన్.టి.ఆర్ కి తొలిసారి ఘంటసాల పాడారు. దేవదాసు పాటలు , మల్లీశ్వరి పాటలు ఘంటసాలకు తెచ్చిన పేరు అంతా ఇంతా కాదు. తొలి దశలో ఘంటసాల స్వరం బాగా లేదని తిరస్కరించిన హెచ్.ఎం.వి సంస్థ ఆ తరువాత అనేక పాటలు పాడించడం విశేషం. పంకజ్ మల్లిక్ , సైగల్ , మహమ్మద్ రఫీల గానాన్ని అధికంగా అభిమానించేవారు. నౌషాద్ సంగీతం , సాలురి రాజేశ్వరరావు సంగీతం అంటే చెవి కోసుకునేవారు ఘంటసాల.

కస్తూరీ తిలకం లలాట ఫలకే వక్షస్థలే కౌస్తుభం… శ్లోకాన్ని తొలిసారి 1956లో చింతామణి చిత్రంలో పాడారు. 1957 లో పాండురంగ మహత్యంలో పాడినప్పుడు ఇంకా వైవిధ్యం చూపారు. సప్త స్వరాలు చిత్రం కోసం 1969 లో మరో ప్రత్యేకత చూపారు. 1969 లో బుద్ధిమంతుడు చిత్రంలో పాడి కంఠంలోని తన విభిన్నత తెలిపారు.

మంచి పాటలు పాడినప్పుడు మరింత సంతోషంగా వుండటమే కాదు మొహం కళ కళలాడుతూ వుండేది. పాటలు పాడేటప్పుడు నిలబడే పాడాలి.హెచ్చు స్థాయిలో పాటలు పాడేటప్పుడు కాళ్ళు బాగా నిగడదన్ని ఒళ్ళు ఎక్కువగా బిగపట్టి పాడేవారు. క్రమ క్రమంగా ఇలాంటి హెచ్చు స్థాయిలో పాటలు పాడినప్పుడు తలనొప్పి , కాళ్ల నొప్పులు చాలా ఎక్కువగా వచ్చేవి. సాహిత్యం బాగాలేని పాటలు పాడటం ఇష్టం లేకపోయినా తప్పనిసరై జాగ్రత్తగా పాడేవారు తప్ప చెడగొట్టేవారు కాదు.

తెలుగులో 88 చిత్రాలకు మిగతా భాషల్లో 22 చిత్రాలకు ఘంటసాల సంగీత దర్శకత్వం చేసారు. ఆయన సంగీత దర్శకత్వం చేసిన సినిమాల్లో పాటలు హిట్ కావడమే కాకుండా శతదినోత్సవాలు , రజతోత్సవాలు జరుపుకునేవి. సాధారణంగా రాసిన పాటలకే బాణీలు కూర్చేవారు. తనకు ఏవైనా బాణీలు నచ్చితే వాటిని తయారు చేసి ఆ ప్రకారం రాయమని కోరడం జరిగేది అప్పుడప్పుడు.

సంగీత దర్శకుడుగా, గాయకుడుగా ప్రయోగాలు చేస్తున్నా ఇతర సంగీత దర్శకులకు పాడేటప్పుడు తాను గాయకుడు అనే విషయాన్ని దృష్టిలో పెట్టుకుని వ్యవహరించేవారు. వారికి పూర్తి స్వాతంత్య్రం ఇస్తూ మర్యాద, మన్నన, గౌరవం పాటించేవారే కాని, వారు చేసే పనిలో జోక్యం చేసుకునేవారు కాదు.

సాలూరి రాజేశ్వరరావు సంగీత దర్శకత్వంలో యశోద కృష్ణ చిత్రంలో గుమ్మడి పాత్రకు చక్కని వాడే బలే టక్కరివాడే … పాటను సుశీలతో కలసి పాడారు. 1975 లో విడుదలైన ఈ చిత్రంలోదే ఘంటసాల చివరిపాట. పాతాళ భైరవి ,పెళ్లిచేసిచూడు, పెళ్లిసందడి, గుండమ్మకథ, జయంమనదేరా , శాంతినివాసం , మాయాబజార్ , పాండవ వనవాసం, పరమానందయ్య శిష్యుల కథ, లవకుశ ఇలా ఎన్నో చిత్రాలకు ఆయన కూర్చిన సంగీతం, ఆయన పాడిన, పాడించిన పాటలు రసగుళికలే. 4 డిసెంబర్ 1922 న కృష్ణాజిల్లా చౌటపల్లిలో జన్మించిన ఘంటసాల 11 ఫిబ్రవరి 1974 మద్రాసులో కాలధర్మం చెందారు.

Image may contain: 2 people, eyeglasses

Posted in Uncategorized | Leave a comment

సినిమా అమ్మ నిర్మలమ్మ 26-11-17

My article in Harivillu ManaTelangana 26-11-17.
సినిమా అమ్మ నిర్మలమ్మ
సాంఘిక నాటకాల్లో హీరోయిన్‌గా నటించి మంచి నటిగా రంగస్థలంపై గుర్తింపు పొంది, పౌరాణిక చిత్రాలలో నటిగా కెరీర్ ప్రారంభించి కొంత గ్యాప్ తర్వాత మళ్లీ చిత్రరంగంలోకి అడుగిడి సహాయ పాత్రలలో రాణించింది. ఆ తరువాత కేరక్టర్ ఆర్టిస్టుగా అమ్మ, అమ్మమ్మ, బామ్మ పాత్రలకు సజీవరూపం ఇస్తూ, యాసలోనూ ఆకట్టుకుని అలరించింది నిర్మలమ్మగా అందరూ ఆప్యాయంగా పిలిచే నిర్మల.

జి.నిర్మలగా సినీరంగంలో ప్రసిద్ధి చెందిన ఈమె అసలు పేరు రాజమణి. కృష్ణా జిల్లాలోని మచిలీపట్నంలో గంగమ్మ, కోటయ్య దంపతులకు గౌడ కుటుంబంలో 1925లో జన్మించింది. రంగస్థల నటనపై మక్కువ పెరిగి పదవ ఏట నుంచే నాటకాల్లో నటించసాగింది. అప్పట్లో ఆమె గొంతు సన్నగా (పీలగా) ఉండటంతో సతీ సక్కుబాయి నాటకంలో నటిస్తున్నప్పుడు సన్నగా వినిపిస్తున్న డైలాగ్స్‌కి ప్రేక్షకులు అల్లరి చేశారు. ఆ తరువాత కొంత అభివృద్ధి చెందింపజేసుకొని స్వరాన్ని మెరుగుపరుచుకుంది. కరవు రోజులు, నేటి నటుడు, నాటకం, దొంగాటకం నాటకాల్లోని ప్రధాన పాత్రలు పోషించి మెప్పు పొందింది.

పెళ్లికి కండిషన్:
రంగస్థల నటుడుగా, నాటక ప్రదర్శకుడుగా గుర్తింపు పొందిన జి.వి.కృష్ణారావు (తరువాత కాలంలో ప్రొడక్షన్ మేనేజర్‌గా పలు హిట్ చిత్రాలకు, భారీ చిత్రాలకు పనిచేస్తూ చిత్రరంగంలో అందరితో ప్రశంసలు పొందేవారు. నిర్మాతకు ఆర్టిస్టులకు మధ్య తగాదాలు రాకుండా సామరస్యంగా సమస్యలు పరిష్కరించేవారు) రాజమణిని చూసి ప్రేమలో పడ్డారు. తరువాత పెళ్లి చూపులకు ఆమె ఇంటికి వెళ్లినప్పుడు ఆనవాయితీ వ్యవహారాలు జరిగాక “ పెళ్లి అయిన తరువాత కూడా నాటకాల్లో నటించడానికి అభ్యంతరం పెట్టకూడదు” అనే కండిషన్ పెట్టింది. రెండు కుటుంబాల పెద్దలు నిర్ఘాంతపోయారు. ఆమెకు సర్దిచెప్పే ప్రయత్నం చేశారు. కండిషన్ సడలించలేదు. తనకు కూడా నాటకాభిరుచి ఎక్కువగా వున్నందున జి.వి.కృష్ణారావు ఆ కండిషన్‌కి అంగీకరించారు. ఆ తరువాత ఆ దంపతులు ఉదయని నాటక సంస్థను నెలకొల్పి పలు నాటకాలు ప్రదర్శించడం, నటించడం వంటి కార్యక్రమాలు నిర్వహించారు.

కరువు రోజులు నాటకం కాకినాడలో ప్రదర్శించినప్పుడు హిందీ నటుడు పృథ్వీరాజ్ కపూర్ (హీరో, దర్శక నిర్మాత రాజకపూర్ తండ్రి, కరీనా కపూర్, రణబీర్ కపూర్‌ల ముత్తాత) చూసి రాజమణి దగ్గరకు వెళ్లి చక్కగా నటించినట్లు (హాస్య, నటుడు చలంని కూడా మరోసారి ఒక నాటకంలో ప్రశంసించారాయన) చెప్పి, మంచి నటిగా ఎదుగుతావు అని ఆశీర్వదించారు.

ఆ తరువాత కొందరు సినీ ప్రముఖుల కారణంగా వారి పిలుపు మేరకు చిత్రరంగంపై దృష్టి మళ్లింది. ఘంటసాల బలరామయ్య స్వీయ దర్శకత్వంలో నిర్మించిన గరుడ గర్వభంగం పౌరాణిక చిత్రంలో సత్యభామ చెలికత్తెగా నిర్మలకు నటించే ఛాన్స్ లభించింది 1942లో. కన్నాంబ కైకేయిగా నటిస్తూ కె.బి.నాగభూషణం దర్శకత్వంలో నిర్మించిన పాదుకా పట్టాభిషేకంలోనూ నటించింది. భర్త జి.వి.కృష్ణారావు సినిమా ప్రొడక్షన్ వ్యవహారాల్లో సహాయపడేవారు. అయితే నటిగా ఆమెకు ప్రొడక్షన్ మేనేజర్‌గా భర్తకు అవకాశాలు అంతంత మాత్రంగా ఉండటంతో ఆదాయం సరిగా లేక అప్పులు చేసేవారు. ఆ అప్పులు తీర్చడానికి ఇద్దరూ మళ్లీ నాటకరంగంపై దృష్టి నిలిపారు. కొన్నేళ్ల తరువాత ఆదుర్తి సుబ్బారావు దర్శకత్వంలో రూపొంది 1961లో విడుదలైన కృష్ణప్రేమ (కృష్ణుడుగా బాలయ్య, చంద్రావళిగా జమున, రాధగా ఎస్.వరలక్ష్మి, సత్యభామగా గిరిజ నటించారీ చిత్రంలో) సినిమాలో రుక్మిణిగా అవకాశం లభించింది. నటిగా ఆమె కు ప్రొడక్షన్ మేనేజర్‌గా జి.వి.కృష్ణారావుకు క్రమంగా అవకాశాలు పెరిగాయి.

అక్కినేని నాగేశ్వరరావు, కృష్ణ కుమారి నటించిన భార్యాభర్తలు చిత్రంలో అక్కినేని తల్లిదండ్రులుగా నిర్మల, గుమ్మడి నటించారు. ఈ చిత్రం హిట్ కావడంతో వీరి కాంబినేషన్లో 20 చిత్రాలు పైనే వచ్చి, నిర్మలలోని నటనను బయటపెట్టాయి. వి.మధుసూదనరావు దర్శకత్వంలో శోభన్‌బాబు, శారద, కాంచనలతో రూపొంది ఘన విజయం సాధించిన మనుషులు మారాలి చిత్రంలో కథానాయకుడు శోభన్‌బాబు తల్లిగా నిర్మల ప్రదర్శించిన నటన ఆమె నట జీవితానికి చక్కని మలుపు తిప్పి తల్లి, వదిన, పిన్ని వంటి పాత్రలకు కేరాఫ్ అడ్రస్ అయింది.
ప్రేమాభిషేకం చిత్రంలో శ్రీదేవి బామ్మగా నటించినప్పటి నుంచి బామ్మ, అమ్మమ్మ, నాయనమ్మ పాత్రలలోను ఒదిగిపోయి ఔరా అనిపించింది ప్రేక్షకులతో. ఇలాంటి పాత్రలలో సాధారణంగా తెల్లగా మెరిసిపోయే చీరకట్టి, కాస్త ఒంగొని, వీపు మీద ఒక చెయి వుంచి కర్రనో, బెత్తాన్నో పట్టుకుని మెల్లిగానో, వేగంగానో నడుస్తూ పాత్రో చితమైన డైలాగ్స్‌తో నవ్వించడమో, ఉడుక్కునేలా చేయడమో చేసేది. రంగస్థల నటిగా వివిధ ప్రాంతాలకు ప్రదర్శనల నిమిత్తం వెళ్లడం వలన, సినిమా షూటింగ్‌లకు ఔట్ డోర్‌లకు వివిధ ప్రదేశాలకు తిరగడం ద్వారా ఆయా ప్రాంతాల యాసని, వేష భాషలను ఆకళింపు చేసుకొని అవసరమైనప్పుడు ఆయా పాత్రల ద్వారా అవి వెలికి వచ్చేలా చేసి తన ప్రత్యేకతను నిర్మల చూపేది.

స్వాతిముత్యం చిత్రంలో అంతర్ముఖుడుగా నటించిన కమల్‌హాసన్ అమ్మమ్మగా అన్నీ తానై చూసుకుంటూ తన అనంతరం ఆ వెర్రి బాగులోడిని ఎవరు చూస్తారా అని ఆరాటపడుతూ, రాధిక మెడలో పుస్తె కట్టాక, అప్పటివరకు అంతర్ముఖుడికి పుణ్యం, పాపం దేవుడు వంటివి వివరించిన తన అవసరం ఇక లేదని గ్రహించి, ఆనందంతో కళ్లు మూసే పాత్ర పోషించి ప్రేక్షకులను కొన్నిసార్లు నవ్వించి కొన్నిసార్లు ఉక్కిరిబిక్కిరి చేసి ఇంతకంటే అద్భుతంగా ఎవరూ చేయలేరన్నంత భావన కలిగేలా చేసింది.

సీతారామరాజు చిత్రంలో కోట శ్రీనివాసరావు అమ్మమ్మగా హరికృష్ణ, నాగార్జున కుటుంబాలపై పగ, ద్వేషం పెంచుకొని కొన్నిసార్లు పాలిష్ట్‌గా, కొన్నిసార్లు ఉద్రేకపరిచేలా పల్నాటి నాగమ్మ తరహాలో వీర ముదుసలి పాత్రలో చేతిలో కర్రతో విలనిజం పండించింది.
గ్యాంగ్‌లీడర్ చిత్రంలో తన మనువడు చిరంజీవి చెప్పేవి వింటూ, ఫోటో ఫ్రేమ్‌లోంచి తన భర్తయే మాట్లాడుతున్నాడని తలచే మామ్మగా ఫొటోఫ్రేమ్‌లో చెప్పిన ప్రతి అంశం తు.చ. తప్పక పాటిస్తూ పొరపాటు జరిగితే లెంపలు వేసుకుంటూ హాస్యం, ఆర్ద్రత, ఆనందం వెల్లిబరిచేలా చేస్తూ ఇలాంటి అమ్మమ్మ వుంటే ఎంత బాగుంటుంది అని ప్రేక్షకులు అనుకునేలా కనిపించింది.

చినరాయుడు చిత్రంలో వెంకటేశ్ తల్లిగా పారపళ్లతో కనిపిస్తూ తన పారపళ్లను, చూసే మీ నాన్న మోహించాడు అనే భ్రమ అతనిలో కల్పిస్తూ ప్రేక్షకులను వినోదింపజేసింది. మాయలోడు చిత్రంలో రాజేంద్రప్రసాద్ బామ్మగా హాస్యాన్ని, భయాన్ని చూపించిన తీరు ప్రత్యేకమే. ఆ ఒక్కటీ ఆడక్కు చిత్రంలోనూ ఇలాంటి పాత్రతోనే మెప్పించింది.

దేవత చిత్రంలో పోకిరిగా వ్యవహరించే తన కొడుకు మోహన్‌బాబుని మంచివాడుగా మార్చా లని తాపత్రయపడేదానిగా, గొడ్డు గోదాలో చివరిది నువ్వు తీసుకుని ముందుది నాకివ్వు అని మోహన్‌బాబు అనగానే చూపిన రియాక్షన్ మరువలేం.శ్రీదేవి, చంద్రమోహన్, మోహన్‌బాబు నటించిన పదహారేళ్ల వయసు చిత్రంలో గంగమ్మగా, మంత్రి గారి వియ్యంకుడులో అన్నపూర్ణమ్మగా, శ్రీ కనకమహాలక్ష్మి రికార్డింగ్ డ్యాన్స్ ట్రూప్‌లో సుందరమ్మగా, కర్తవ్యంలో మహలక్ష్మిగా, కిల్లర్‌లో సుబ్బలక్ష్మిగా, మామగారులో కాంతమ్మగా, అమావాస్య చంద్రుడులో ఎల్.వి.ప్రసాద్ భార్యగా ప్రదర్శించిన నటన ఎప్పటికీ గుర్తుండిపోయేదే.

మావిచిగురులో కోదండరాముడు కొమ్మలాల వాడు కౌసల్య కొమరుడంట కొమ్మలాల పాటలో వృద్ధజంటగా అల్లు
రామలింగయ్యతో కలిసి చేసిన నటన చెప్పుకోదగ్గదే. గరుడ గర్వభంగంలో ఆ చిత్ర నృత్య దర్శకుడు తరువాత కాలంలో దేవదాసు, చిరంజీవులులాంటి చిత్రాల దర్శకుడు వేదాంతం రాఘవయ్యతో కలిసి చేసిన నృత్యం విశేషమైనదే.

పల్లెటూరు యాసతో, సిసలైన పల్లెటూరి స్త్రీగా, ఆ కట్టుబొట్టుతో మెప్పించడంలో నిర్మలకు సాటి రారెవరూ. నాజూగ్గా తిట్టడంలో, మొరటుగా తిట్టడంలో నూ ఆ పాత్రల ద్వారా మెప్పు పొందింది. తింగర సచ్చినోడా… నీయమ్మ కడుపు కాలా… వంటి తిట్లు నవ్వుకునేలా చేస్తాయి.
మయూరిలో ఉత్తమ సహాయ నటిగా, సీతారామరాజులో ‘ఉత్తమ కేరక్టర్ ఆర్టిస్టుగా నంది అవార్డులు స్వీకరించింది.
శంకరాభరణంలో చంద్రమోహన్ బామ్మగా శంకరశాస్త్రి ఇంటికి పెళ్లిచూపుల నిమిత్తం వెళ్లినప్పుడు శంకరశాస్త్రి (జె.వి.సోమయాజులు)ని చూడగానే ప్రదర్శించిన గౌరవం,అభిమానం, వినయ విధేయతలు, అన్నవరం గుడివద్ద ప్రసాదం విషయంలో మనవడు చంద్రమోహన్‌తో, గుడి మెట్ల మీద మరో చెంబు ప్రహసనంకి ముందు వెనుక అద్భుత అభినయం చూపింది.
బలిపీఠం చిత్రంలో శోభన్‌బాబు సోదరిగా హరిజన యువతితో కనిపించిన విధానం, పలికించిన యాస, మరదలు శారదపై చూపిన ప్రేమ తదితరం మరపురానివే.

రేలంగి నరసింహారావు దర్శకత్వంలో రాజేంద్రప్రసాద్, రజని జంటగా, నూతన్ ప్రసాద్, అల్లురామలింగయ్య, రావికొండలరావు, పొట్టి ప్రసాద్ ప్రభృతులతో నిర్మల ఆర్ట్ పతాకాన చలాకి మొగుడు చాదస్తపు పెళ్లాం చిత్రాన్ని నిర్మించింది.
సూర్యకాంతం వలనే నిర్మలకు కూడా పేకాట అంటే ఇష్టం. షూటింగుల్లో కాస్త విరామం దొరికినా, ఔట్‌డోర్ షూటింగ్‌లకు వెళ్లినప్పుడూ కొత్త పేక దస్త్రాలు విరివిగా పట్టుకెళ్లేది. రైలులో కూడా కాలక్షేపం కోసం షూటింగ్ యూనిట్ వారిని చతుర్ముఖ పారాయణంలో పాల్గోనేలా చేసేది.

చేపల కూర బాగా వండుతుందనే పేరు వుండేది. ఆ కూర తినడానికే కొంతమంది ప్రత్యేకంగా ఆమె ఇంటికి వెళ్లేవాళ్లమనేవారు. పిండి మరకైనా విశ్రాంతి ఉంటుంది కానీ నా నోటికి తిండి విషయంలో విశ్రాంతి వుండదనేది.

కులగోత్రాలు, దేవత, ఏకవీర, యమగోల, చిల్లరకొట్టు చిట్టెమ్మ, శివరంజని, పట్నం వచ్చిన పతివ్రతలు, శుభలేఖ, బాబాయి అబ్బాయి, నాకూ పెళ్లాం కావాలి, విశ్వనాథ నాయకుడు, ఖైదీ నెం.786, మగమహారాజు, వారసుడొచ్చాడు, శివ, బావబావమరిది, మాతృదేవోభవ, రాయుడు ఇలా ఎన్నో చిత్రాల్లో చక్కని నటన ప్రదర్శించింది. 2009న ఫిబ్రవరి 19న అనారోగ్యంతో మృతిచెందింది.

Image may contain: 1 person, selfie and closeup

Posted in Uncategorized | Leave a comment