హాస్యనాభం పద్మనాభం

My article in Harivillu,ManaTelangana dt.9-4-2017.
హాస్యనాభం పద్మనాభం
కడప జిల్లా పులివెందుల సమీపంలోని సింహాద్రిపురం గ్రామానికి కరణీకం చేసే బసవరాజు వెంకట శేషయ్య, ఆయన భార్య శాంతమ్మలకు పెద్ద కొడుకుగా 1931 ఆగస్టు 20న జన్మించారు. బాలసారెలో పెట్టిన పేరు వెంకట పద్మనాభరావు. మంచి కళాకారుడుగా క్రమక్రమంగా గుర్తింపు పొందుతాడు అన్నారట జాతకం పరిశీలించిన జ్యోతిష్యులు. తండ్రి కూడా నాటకాల్లో నటించేవాడైనందున చిన్నతనం నుంచే నాటకాలు చూడటం, ఆ పద్యాలు వింటూ పాడటం అలవాటు చేసుకున్నారు. ఆరేళ్లు దాటాక చింతామణి నాటకంలో కృష్ణుడుగా నటించి పద్యం పాడి ఒన్స్‌మోర్ అనిపించుకున్నారు. దానికి తగ్గట్టు ఆ వూళ్లో గ్రాంఫోన్ రికార్డుల ద్వారా వినిపిస్తున్న రంగస్థల నటుల పద్యాలు, పాటలపై ఆసక్తి పెరిగి అలాగే పాడటం అలవాటు చేసుకున్నాడు. ఇంటికి దగ్గరలో టూరింగ్ టాకేస్ కూడా వుండటంతో చదువు మీద కంటే సినిమాలు, నాటకాల మీదనే దృష్టి ఎక్కువగా లగ్నమైంది.

చూసింది గుర్తు పెట్టుకొని అలా నటించేస్తూ ఎలుగెత్తి పాటలు పద్యాలు రాగయుక్తంగా ఆలపిస్తుంటే చుట్టూ జనం చేరేవారు. చప్పట్లు కొడుతూ మళ్లీ పాడించుకోసాగారు. కరణంగారి అబ్బాయి మా బాగా పాడుతున్నాడంటూ డబ్బులు, చిరుతిళ్లు, చిన్న చిన్న బహుమతులు ఇవ్వసాగారు. పాలు, పెరుగు కోసం కామంధుల ఇంటికి వెడితే పాటలు, పద్యాలు పాడించుకుని పాలు, పెరుగు పోసేవారు. చిరుతిళ్లు పెట్టేవారు. బాల్యంలోనే కళాపోషణ, సంపాదన ఏర్పడటంతో చదువు మీదకి దృష్టి మళ్లేది కాదు. అతి తక్కువ మార్కులు వస్తూ వుంటే ఎలాగో అయిదో తరగతి అవచేసాక, పొద్దుటూరులో చదువుకొమ్మని తమ్ముడితో అమ్మమ్మ ఇంటికి పంపేశారు. స్థోమత లేని అమ్మమ్మ అయినందున మధుకరము (భిక్షాటన) కోసం కొన్ని ఇళ్లకు వెళ్లి వారు ఇచ్చే ఆహార పదార్థాలతో పొట్ట నింపుకునేవారు. పొద్దుటూరులో కూడా సినిమాలు, నాటకాలతోనే పొద్దుపుచ్చుతూ పుస్తకాల ఊసు ఎత్తేవారు కాదు.

పన్నెండేళ్ళు వచ్చేసరికి సినిమాల్లో నటించేయాలన్న కోరిక పొద్దుటూరులో వుండనీయలేదు. జేబులో డబ్బు లేకపోయినా ఎర్రగుంట వెళ్లి మద్రాసు రైలు ఎక్కేసాడు. రైలులో కూడా పాటలు పాడుతూ కాసిని డబ్బులు సంపాదించాడు. చండిక సినిమా చూసినప్పుడు కన్నాంబ అభిమానిగా మారిపోయిన పద్మనాభం కనిపించిన ప్రతి వాళ్లని కన్నాంబ ఇంటి చిరునామా అడుగుతూ చివరికి ఆమె ఇంటికి చేరాడు. ఆ ఇంటి ముందు పడిగాపులు పడుతూ ఆమె దృష్టిలో పడ్డాడు. తిండితిప్పలు లేని బాలుడుని తెలిసి కొసరి కొసరీ మరీ తినిపించింది. పాడిన పాటలు, పద్యాలు విని తాము తీసే పాదుకాపట్టాభిషేకంలో పాడించమని భర్త కడారు నాగభూషణంకి సిఫారసు చేసింది. షూటింగ్ జరిగే జెమిని స్టూడియోకి వెళ్లి కన్నాంబకు కనిపించి, అక్కడున్న సి.ఎస్.ఆర్ ఆంజనేయులు, కె. రఘు రామయ్య, అద్దంకి శ్రీరామమూర్తి మున్నగు నటులకు, దాసరి కోటి రత్నంకి పద్యాలు వినిపించి మెప్పు పొందాడు. రాజరాజేశ్వరి కంపెనీలో నెలకు నలభై రూపాయల జీతంతో కొన్నాళ్లు పనిచేశాడు. గూడవల్లి రామబ్రహ్మం దృష్టిలో పడి ఆ సంస్థలో కూడా నలభై రూపాయల జీతానికి మాయా లోకంలో రాజకుమారుడు పాత్రకు కుదురుకున్నాడు. నాగయ్య నటిస్తున్న త్యాగయలో శిష్యుడుగా ముగ్గురు మరాఠీలులో ఒక చిన్న పాత్రలో, భక్త తుకారాం, నారదనారది వంటి చిత్రాల్లో బాలనటుడుగా 1946 వరకు నటించారు. రచయిత సదాశివ బ్రహ్మం దృష్టిలో పడి కాళ్లకూరి సదా శివరావు దర్శకత్వంలో ఆర్. పార్థసారథి నాయుడు నిర్మించిన రాధిక చిత్రంలో కృష్ణుడుగా హీరో పాత్ర చేసే అవకాశం సాధించుకున్నారు. 1947లో ఈ చిత్రం విడుదలై కృష్ణుడుగా నటించిన పద్మనాభరావుకి మంచి పేరు తెచ్చింది. పొట్టికృష్ణుడు అనిపించుకున్నారు.

స్వగ్రామం వెళ్లి అక్కడ కాలక్షేపం చేస్తుంటే (షూటింగ్‌లు లేని కారణంగా) తమ్ముడు, ఆ తర్వాత చెల్లెలు చనిపోయారు 1948లో. జీవితంలో స్తబ్దత ఏర్పడింది. పొట్టివాడికి వేషాలేం వస్తాయనే నిరాశ ఏర్పడింది. తండ్రి సూచనతోకరణీకం విధులు ఎలా నిర్వహించాలో శిక్షణ పొందడం ప్రారంభించాడు. అలా రోజులు గడుస్తుంటే సి.పుల్లయ్య దర్శకత్వంలో రూపొం దే వింధ్యరాణి చిత్రంలో నటించడానికి రమ్మని మనిషితో కబురు పంపడంతో హుషారుగా మద్రాసు చేరితే అగ్రిమెంటు రాయించి నటింపజేశారు. షావుకారు చిత్రంలో పోలాయ్ వేషం ఇస్తూ విజయా సంస్థకు మూడేళ్ల అగ్రిమెంటు రాయించారు. పాతాళ భైరవిలో మాంత్రికుడి ఎస్.వి.రంగారావు శిష్యుడు వేషం వేశాడు. మోసం గురూ అంటూ పలికిన డైలాగ్ పద్మనాభంకి మంచి గుర్తింపునిచ్చింది. శ్రీకాళహస్తి మహత్శంలో కాశిగా, సతీ అనసూయలో నారద మహర్షిగా, మా ఇలవేలుపు, పాండురంగ మహత్యం చిత్రాల్లో మంచి పాత్రలు పోషించే అవకాశం, అవి విడుదలయ్యాక పేరు వచ్చింది. కార్తవ రా యుని కథలో కామెడీ విలన్‌గా నటించాడు.

వెరైటీ నవ్వు
భార్యాభర్తలు చిత్రం విడుదలయ్యాక టాప్ కమెడియన్ అయ్యారు. ఇద్దరు మిత్రులు, కులగోత్రాలు గులేబకావళి కథ, దాగుడు మూతలు, పూలరంగడు, లక్ష్మీనివాసం తదితర చిత్రాలు కమెడియన్‌గా పేరు తెచ్చాయి. తక్కువ గ్యాస్ వుండే ఆంధ్రా సోడా (గోళీ సోడా అని అంటారు)ని కొడితే అందులోంచి గ్యాస్ విచిత్రమైన శబ్దంతో వస్తుంది. ఆ మాదిరిగా నవ్వడం పద్మనాభంకి ట్రేడ్ మార్క్ అయింది. లక్ష్మీనివాసంలో పిఠాపురం పాడగా పద్మనాభంపై చిత్రీకరించిన సోడా సోడా గోలీ సోడా ఆంధ్రా సోడా సోడా తాగు తెలుగోడా చల్లని సోడా దాని మహిమ చెప్పలేడు దేవుడు కూడా జిల్ జిల్ సోడా…. పాటలో నటన చాలా పేరు తెచ్చింది. పద్మనాభంలా నవ్వడానికి చాలామంది ప్రయత్నించి కృతకృతులయ్యేవారు. చిన్న పిల్లల్లా ముద్దు ముద్దుగా, ముద్దముద్దగా డైలాగ్స్ పలకడం ద్వారా హాస్యం సృష్టించడం కూడా ఆయన ట్రేడ్ మార్క్ అయింది. అభిమానులు అలా మాట్లాడే ప్రయత్నం చేసేవారు.

సినిమాలో బిజీ అయ్యేసరికి 1961 ప్రాంతంలో మిత్రుడు నటుడు వల్ల నరసింహారావుతో కలిసి రేఖా అండ్ మురళి ఆర్ట్ నాటిక సంస్థను నెలకొల్పారు. సినిమాల్లో నటిస్తూనే పేరిగాడు రాజంట కాళహస్తి మహత్శ్యం, శాంతి నివాసం, అల్లూరి సీతారామరాజు తదితర నాటకాలలో నటిస్తూ మూడొందలకుపైగా ప్రదర్శనలు వివిధ పట్టణాలలో ఇచ్చారు.

నిర్మాత దర్శకుడుగా
నాటకాల ద్వారా లాభాలు రావడంతో ఆ నాటక సంస్థ పేరుతోనే ‘దేవత’ చిత్రాన్ని కె.హేమాంబరధరరావు దర్శకత్వంలో ఎన్.టి.రామారావు, సావిత్రి ప్రభృతులతో నిర్మించి 1964లో విడుదల చేశారు. ఈ చిత్రం సూపర్ హిట్ అయింది. తను హీరోగా పొట్టి ప్లీడరు, శ్రీశ్రీశ్రీ మరాదరామన్న కథ, శ్రీరామకథ, ఆజన్మ బ్రహ్మచారి, మాంగల్యభాగ్యం, జాతకరత్న మిడతం బొట్లు చిత్రాలు నిర్మించారు. కథానాయిక మొల్ల చిత్రం వాణిశ్రీ నాయికగా నిర్మిస్తే బంగారు నంది వచ్చింది. శ్రీరామకథ చిత్రంతో దర్శకుడుగా కూడా (1968) మారిన పద్మనాభం కథానాయిక మొల్ల, జాతకరత్నం మిడతం బొట్లు, పెళ్లికాని తండ్రి, ఆ జన్మ బ్రహ్మచారి చిత్రాలకు దర్శకత్వం కూడా నిర్వహించారు. ఈ చిత్రాలన్నీ రేఖా అండ్ మురళీ ప్రొడక్షన్స్ పతాకాన నిర్మితమైనవే. నిర్మాతగా సోదరుడు బి.పురుషోత్తం పేరు వుండేది. సినిమాల్లో వేషాలు తగ్గి కొంతకాలం ఇంట్లోనే వుండిపోయారు.
ఎన్.టి.ఆర్. వాణిశ్రీ నటించిన దేశోద్ధారకుడు చిత్రంలో రిక్షావాడి పాత్ర పోషిస్తూ ‘ఆకలయ్యి అన్నమడిగితే పిచ్చొడన్నారు నాయాళ్లు…. పాటలో చూపిన నటనతో మళ్లీ సినిమాల్లో పుంజుకున్నారు.

60 వేల అప్పు – కోల్పోయిన సినిమా హక్కులు
నిర్మాతగా కొన్ని బాకీలు తీర్చాల్సి వచ్చింది ఒక ఫైనాన్షియర్ వద్ద అరవై వేల రూపాయలు రుణం తీసుకుంటూ అతడు పెట్టమన్నచోట సంతకాలు పెట్టేశారు. అనుకున్న సమయానికి అప్పు తీర్చలేకపోయారు. తరువాత తీర్చేశారు కాని అబద్దపు లెక్కలు చూపి రుణం తీరలేదని చెప్పి, సంతకాలు పెట్టిన పత్రాలు చూపి పద్మనాభం నిర్మించిన ఎనిమిది సినిమాల నెగెటివ్ హక్కులను అతడు స్వాధీనపరచుకున్నాడు కోర్టు ద్వారా. ఆ బాధ, బెంగతో కాశీ వెళ్లిపోయి కొంతకాలం తర్వాత తిరిగొ చ్చారు. ఎవరినైనా నమ్మితే ఇలాగే బాధపడాల్సి వస్తోంది అని చెప్పారు గతంలో.

దేవత చిత్రంలో ఎల్.ఆర్. ఈశ్వరితో కలిసి మావూరు మదరాసు నా పేరు రామదాసు…. గీతాన్ని పాడారు. గీతాంజలి , పద్మనాభంపై చిత్రీకరించిన ఈ పాట బాగా హిట్టయింది. కొత్త కాపురం చిత్రంలో చిలకా ఇటు రావే బంగారు చిలకా ఓ రంగుల రామ చిలుకా ఇటురావె బంగారు చిలకా…. అని పాడారు. పద్మనాభం రమాప్రభలపై చిత్రీకరించిన ఈ గీతం కూడా ప్రాచుర్యం చెందింది. గీతాంజలి పద్మనాభంలకు హిట్ హాస్యజంటగా చాలా పేరుండేది. అవే కళ్లు, సంబరాల రాంబాబు, అదృష్టవంతులు, చిట్టిచెల్లెలు, బాగ్దాద్ గజదొంగ తదితర చిత్రాలలో పద్మనాభం గీతాంజలి జంట పండించిన హాస్యం అలరిస్తూనే ఉంటుంది.

పాండవ వనవాసంలో లక్ష్మణ కుమారుడుగా, వీరాభిమాన్యులో ఉత్తర కుమారుడుగా, సతీ అనసూయ, శ్రీరామకథ చిత్రాలలో నారదుడుగా, శ్రీకృష్ణ తులాభారం, శ్రీకృష్ణ సత్యలో కృష్ణుడి మిత్రుడు వసంతకుడుగా నటించి గుర్తింపు పొందారు. బొబ్బిలియుద్ధం, సారంగధర, కథానాయిక మొల్ల మున్నగు చారిత్రక చిత్రాల ద్వారా నటుడుగా మెప్పు పొందారు. కంచుకోట, పరమానందయ్య శిష్యుల కథ మున్నగు జానపద చిత్రాలలో కథానాయకుడు మిత్రుడుగా రాణించారు. దేవత, పూలరంగడు, సుమంగళి చదువుకున్న అమ్మాయిలు, డాక్టర్ చక్రవర్తి, దాగుడు మూతలు, లేత మనసులు, వరకట్నం, కోడలు దిద్దిన కాపురం, దసరా బుల్లోడు, గూఢచారి 116, బ్రహ్మచారి, నిర్దోషి, ధర్మదాత, ఇంద్రనుస్సు ఇలా పలు సాంఘిక చిత్రాలలోనూ నటుడుగా మంచి గుర్తింపు లభించింది. పద్మనాభం నటించిన చివర చిత్రం టాటా బిర్లా మధ్యలో లైలా.

చిత్ర పరిశ్రమ పూర్తిగా హైదరాబాద్‌లో స్థిరపడిపోయింది కనుక సినిమాల్లో, టెలివిజన్లో నటించాలనే ఆలోచనతో 2005 ప్రాంతంలో మద్రాసు నుంచి హైదరాబాద్ వచ్చేసి స్థిరపడిపోవాలని ఆలోచించారు. నిర్ణయం తీసుకున్నారు కానీ అమలు కాలేదు గుండెపోటు కారణంగా చెన్నైలోని స్వగృహంలో 2010 ఫిబ్రవరి 20న ఇహలోకం విడిచారు.

బీహార్లో తుపాను వచ్చినప్పుడు శ్రీశ్రీశ్రీ మర్యాద రామన్న కథ చిత్రం నుంచి వచ్చిన లాభాలతో అప్పట్లో 15 వేలు విరాళం ఇచ్చారు. దివిసీమ తుపాను వచ్చినప్పుడు ఆ సమయంలో పేరిగాడు రాజంట నాటక ప్రదర్శనల వలన వచ్చిన ఆదాయం అంతా బాధితులకు లాంతర్లు వగైరా కొనుగోలు చేయడానికి వెచ్చించి వారందరికీ అందే ఏర్పాటు చేశారు. తెలుగు సినిమా వజ్రోత్సవాలు జనవరి 2007లో జరిగినప్పుడు ప్రేమ కోసమై వలలో పడెనే పాపం పసివాడు వంటి పాటలు పాడి తన స్టామినా తగ్గలేదని నిరూపించుకున్నారు. కన్నాంబతల్లి పెట్టిన అన్నం, నాగయ్య చూపిన అభిమానం, గూడవల్లి రామబ్రహ్మం వాత్సల్యం, కె.వి.రెడ్డి ఆశీస్సులే రూపాయి లేకుండా మద్రాసు చేరిన తనను ఇంత వాడిని చేశాయని తరచు తలుచుకుంటూ సన్నిహితులకు చెబుతూ వుండేవారు

Image may contain: 1 person, eyeglasses, sunglasses, selfie and closeup
Image may contain: 1 person, closeup

Advertisements

About vskesavarao

I am a Telugu Journalist. I started career as a Journalist 1976 in Andhrapatrika Daily. I am one of the founder member in the Editorial Board of Andhra Bhoomi Illustrated Weekly after February 1977.Latter I worked in Venditera Film weekly. I joined in Chitrabhoomi Film Weekly during 1980 of Kakatiya Publications, Hyderabad. It's Publisher is Mr.D.Bheem Reddy. We brought Aadivaram a Socio Political weekly &and Mayuri Illustrated weekly from this Organisation. I worked for this organisation in Hyderabad &and Madras upto 1983. Later I Joined in EENADU daily and worked until April 1984. Then joined again in Chitrabhoomi. Afterwards ie., during 1986 I joined in Andhraprabha daily in Hyderabad. Madras edition started after a long time and I was sent to Madras., Hyderabad as my headquarters.I worked for Vijayachitra a Film Monthly & Film Tradeguide weekly in Madras until1994.Afterwards I came to Hyderabad and joined in Andhraprabha telugu Daily. Now I am Editor in Charge for Chitraprabha a Thursday Film suppliment of Andhraprabha Daily from 2007.
This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s